மும்பை:
செப்டம்பர் மாதத்தில் இந்தியப் பங்குச்சந்தையில் ஐபிஓ வெளியீடுகள் வேகம் பெற்றுள்ளன. மொத்தம் 34 நிறுவனங்கள் ஐபிஓ மூலம் ரூ.39,339.55 கோடியை திரட்டியுள்ளன.கடந்த ஆண்டு செப்டம்பரில் 25 நிறுவனங்கள் ரூ.13,301.54 கோடி திரட்டிய நிலையில், இந்த ஆண்டு வெளியீடுகளின் எண்ணிக்கை 36 சதவீதமும், திரட்டப்பட்ட தொகை 196 சதவீதமும் அதிகரித்துள்ளது.
செப்டம்பர் மாதத்தில் மட்டும் என்எஸ்இ நிறுவனத்தின் ஐபிஓ மூலம் ரூ.22,562.71 கோடி திரட்டப்பட்டது. இது அந்த மாதத்தில் திரட்டப்பட்ட மொத்த தொகையில் பாதிக்கும் அதிகமாகும்.
இதற்கிடையே, வரும் மாதங்களில் ஐபிஓ சந்தையில் மேலும் பெரிய அளவிலான வெளியீடுகள் வர உள்ளன. செப்டம்பர் 25 நிலவரப்படி 237 நிறுவனங்கள் சுமார் ரூ.4.48 லட்சம் கோடி திரட்டுவதற்கான திட்டத்தில் உள்ளன.
இதில் 120 நிறுவனங்களின் ஐபிஓக்களுக்கு செபி ஒப்புதல் கிடைத்துள்ளது. இவை மூலம் ரூ.2.34 லட்சம் கோடி திரட்ட திட்டமிடப்பட்டுள்ளது. மேலும் 117 நிறுவனங்களின் விண்ணப்பங்கள் செபி ஒப்புதலுக்காக காத்திருக்கின்றன. இவற்றின் மதிப்பு ரூ.2.13 லட்சம் கோடியாகும்.
ஒப்புதல் பெற்றுள்ள பெரிய ஐபிஓக்களில் ஜியோ பிளாட்ஃபார்ம்ஸ் ரூ.37,700 கோடி, அவாடா எலக்ட்ரோ ரூ.7,600 கோடி, ஓராவெல் ஸ்டேஸ் (ஓயோ) ரூ.6,650 கோடி, ஸெப்டோ ரூ.5,106 கோடி மற்றும் இன்ஃப்ரா.மார்க்கெட் ரூ.5,000 கோடி ஆகியவை இடம்பெற்றுள்ளன.
ஒப்புதலுக்காக காத்திருக்கும் நிறுவனங்களில் போன்பே ரூ.12,000 கோடி, இனாக்ஸ் கிளீன் எனர்ஜி ரூ.10,000 கோடி, மகாநதி கோல்ஃபீல்ட்ஸ் ரூ.10,000 கோடி அளவிலான ஐபிஓ திட்டங்களுடன் உள்ளன.
செப்டம்பர் மாத ஐபிஓக்களின் பட்டியலிடப்பட்ட நாள் சராசரி லாபம் 17.03 சதவீதமாக இருந்தது. அக்டோபர் 1 நிலவரப்படி, அந்த மாதத்தில் வெளியான ஐபிஓக்களின் சராசரி வருமானம் 22.96 சதவீதமாக இருந்தது. எனினும், வரவிருக்கும் ஐபிஓக்களின் எண்ணிக்கையும் திரட்டும் தொகையும் இறுதி முடிவாகாது; சந்தை நிலவரத்துக்கு ஏற்ப வெளியீட்டு கால அட்டவணை மற்றும் அளவு மாறக்கூடும்.
